كلمتين لمصر

كل عين تعشق حليوة .. وانتى حلوة فى كل عين
يا حبيبتى قلبى عاشق .. اسمحيلى بكلمتين
كلمتين يا مصر يمكن هما أخر كلمتين 
حد ضامن يمشى أمن أو مآمن يمشى فين
شابة يا ام الشعر ليلى
والجبين شق النهار ..
والعيون بحرين امانى . والخدود عسل ونار
واللوالى فى ابتسامتك يحكوا اسرار المحار
يالى ساكنة القصر عالى . امتى يهنالى المزار
كلمينى يا صبية طال عليا الانتظار
كلمتين يا مصر يمكن .. هما اخر كلمتين
قصرك المسحور غيلانة .. اغبى من دود الغيطان
بعد مص الغصن الاخضر .. ينحتوا عضم العيدان
والى خلىّ الارض خضرا والى خلىّ الدار امان
عاش بجوعة ملو جوفة مات بخوفة .. من الغيلان
روح الغلبان ماقلش عن شقى العمر الى كان
ادى كلمة من عذابى قولتهالك
باقى كلمة من حنينى صنتهالك
فى الضلوع من دنيا ظالمة
كنت خايف يلمحوها
يقتلوها فى سكة ضلمة
شقشقت والنور بشاير
زهرة الصبار يا سلمىّ
يا حنين الشوق يا طاير . خد لمصر الصبح كلمة
كلمة يبقى الركب ساير بالبصاير والعنين
يبقى ضامن يمشى آمن .. يبقى شايف يمشى فين
                   كلمات .. احمد فؤاد نجم

0 للتعليق >>> إضغط هنا: