قصيدة ـ الفول واللحمة .. لـ أحمد فؤاد نجم

عن موضوع الفول واللحمة صرح مصدر قال مسئول
ان الطب اتقدم جداً . . والدكتور محسن بيقول
ان الشعب المصرى خصوصاً .. من مصلحتة يقرقش فول
حيث الفول المصرى عموماً يجعل من بنى آدم غول
تاكل فخدة فى ربع زكيبة والدكتور محسن مسئول
يديك طاقة وقوة عجيبة .. تسمن جداً تبقى مهول
ثم اضاف الدكتور محسن ان اللحمة دى سم اكيد
بتزود اوجاع المعدة وتعود على طولة الايد
وتنيم بنى آدم وتفرقع منه المواعيد
واللى بياكلوا اللحمة عموماً . هايخشوا جهنم تأبيد
يا دكتور محسن يا مزقلط يا مصدر يا غير مسئول
حيث ان انتو عقول العالم والعالم محتاج لعقول
ما رآى جنابك وجنابهم فى واحد مجنون بيقول
احنا سيبونا نموت باللحمة وانتو تعيشوا وتاكلوا الفول
ما رأيك يا كابتن محسن 
مش بالذمة كلام معقول .

0 للتعليق >>> إضغط هنا: