قصيدة ( العنبرة ) لـ أحمد فؤاد نجم


عنبـــــــــَّـــــــــر .. كله يسمع
 شخشخت بالزهر مانصفنيش ولا مرة
وراهنت بالمهر والبقشيش على مرة
والسجن للحُر وان كان مر .. 
ولا مرة .. فكرتنى بالتوبة من دى النوبة .. ولا مرة !
 الاوله للنبى .. والتانية ايوب ..
والتالته غربتى .. والرابعة المكتوب
والخامسة .. اللى افترى حتماً يبات مغلوب
الاوله يا نبى يا محرر الانسان يا بلسم المُبتلى يا نجدة الغلبان
كرمت صنف البشر عن طايفة الحيوان 
ورفعت سيف الهدى عالى على الطغيان
وزعقت يا امتى .. فى سائر الازمان 
الظلم يوم لو حكم .. والحق يوم لو هان
يحرم عليك المطر والفى والعمران
تسرح بحورك عطش .. فى الزرع والإنسان
ويجر فيك الحنش وتحوم الغربان .. 
ترمى الخراب ع الجبل والسهل والوديان
النور يغور م السما .. وجه القمر ما يبان
والشوف يضيع فى العما والضلمة والاحزان
والخوف يطيح فى البشر من قسوة السجان
الناس تخاف بعضها .. وتخوف السلطان
والتانية ، قولت أنا آيوب وانا مثلين
آيوب ولما ابتلى .. آيوب صبرله يومين
طلعت عليه القصص واتنادى بالاسمين
عدوه من الانبيا والصالحين الاتنين
وانا اللى صبرى هنا جوة اللُمان صبرين
صبرى على خطفتى من عزوتى والبين
وصبر تانى على حكم الزمان يا عين
الندل فينا حكم .. والندل حكمة شين
حكم البقر ع البشر .. بشريعة القرنين
وحق تربة نبى طه كحيل العين
هالبت يوم يتنصب بدال الميزان اتنين.. 
وانظر بعين الرضا للعدل فى الميزانين
والتالته، غربتى فى عالم الاندال
الندل فيه احتمى .. والحُر فيه انطال
والواطى لما اعتلى .. اجرله كام طبال
الشحط والبلطجى واللص والمحتال
ومين يحب النبى .. سقفة كمان يا عيال
الرقص دار فى البلد عمال على بطال
واللحم لما اتكشف .. غطى على اللى اتقال
لا سمعنا صوت فى النغم .. ولا شعر فى الموال
خنقوا الكلام فى الغُنى .. والرنة فى الخلخال
واحد يا موحد الواحد
اتنين يا جد الحسين
تلاته يا سوء الشماته
اربعة يا حبر المطبعة
خمسة يا عزمى يا حى
سته يا بكرة يا جاى
سبعة يا قلبى يا مايل
تمانية يا شوق الزمايل
تسعه يا دنيا يا واسعة 
عشرة يا خاين يا حشرة
اعرفكم جميعاً ان السجن سور ..
اعرفكم جميعا ان الفكر نور
اعرفكم جميعا ان السجن شايخ
واعرفكم جميعا ان بابه خايخ
واعرفكم جميعا ان الثورة فكرة
واعرفكم جميعا انه هايبقى ذكرى
وابشركم جميعاً .. ان الوعدة بكرة
والنور عندنا وعندكوا .. يا حبايب ،


5 للتعليق >>> إضغط هنا:

  Zeina

10/7/11

النور يغور م السما .. وجه القمر ما يبانالميم دى مش بتفكرك بحاجة؟؟ههههههههبس تعليقى عالقصيدة ابدااااااااااااااااااااااااااااع

  ahmednegm

10/7/11

لأ فكرينى إنتى ؟

  fatma Darwish

1/9/11

احمد نجم شاعر مبدع محترم لم يبع قلمه لاي حاكم ولم يهادن ويساوم ودفع الثمن غاليا ولكنه ظل الشاعر الصادق الامين لفكره فظل مبدعا مبهرا في كل مايقول وهذه القصيده احدي الروائع

  ahmednegm

4/9/11

الفاجومى قضى تقريباً 18 سنه من عمرة فى داحل المتقلات ،، وهو انسان عاشق لتراب مصر بالمعنى الحقيقى للكلمة دون ان يطمح فى منصب او جاه او حتى شهرة ،، تحياتى لكِ ، ولكل محبى نجم  :)

  ahmednegm

4/9/11

لا الحقيقة مش واخد بالى يا زينة !