شى لله يا لغزاوية .. لـ احمد فؤاد نجم


شى لله يا لغزاوية
يا وجع الامة العربية
لا انتو حماس ولا عباس
فلسطين هى القضية
شى لله وعلى دلعونا
حكمونا ولاد الملعونة
والاخر خاتم وباعونا
للسمسار والصهيونية
شى لله وانتوا لوحديكوا
الله ينصركوا ويهديكوا
ويدمر دولة اعاديكوا
والايام اهى رايحة وجاية
شى لله ولا عادش رجوع
ويّا الخاين والجربوع
الاطفال ماتت م الجوع
والعطشان مش لاقى المية
شى لله على احلى كلام
ناس تصحى والامة تنام
يعنى قفاك يصبح قدام
يالعربى..  وتركب عربية

0 للتعليق >>> إضغط هنا: