كلب الست


فى الزمالك .. من سنين ، وفى حمى النيل القديم
قصر من عصر اليمين .. ملك واحدة من الحريم
صيتها أكتر م الأذان .. يسمعوه المسلمين
والتتر والتركمان والهنود والمنبوذين
ست فاقت ع الرجال فى المقام والإحترام
صيت وشهرة وتّل مال .. يعنى فى غاية التمام
قصرة يعنى هى كلمة .. ليها كلمة فى الحكومة
بس ربك لجل حكمة .. قام حرمها م الأمومة
والأمومة طبع ثابت جوه حوا من زمااااان
تعمل ايه الست جابت 
فوكس رومى وله ودان
فوكس ده عقبال آملتك عنده دستة خدامين
يعنى مش موجود فى عيلتك شخص زية يا اسمعين
واسماعين ده يبقى واحد م الجماعة التعبانين
الى داخوا فى المعاهد والمدارس من سنين
حب يعمل واد فكاكة .. ويمشى حّبة فى الزمالك
والقيامّة والفتاكة .. ترمى طبعاً ع المهالك
عم سمعه من قيامتة حب يعمل فيها فلة
بعد ما ألوظ بيجامتة .. اشترى حتة مجلة
قول مشى بيقرا فى حكاية من حكايات الغرام
واندماجة فى القراية خلىّ مشيه مش تمام
ع اليمين يحدف بعيـــد ، خطوتين ويروح شمــال
لمحة فوكس من الحديد .. قال ده صيد سهل وحلال
هوباا نط فـ كرشة دوغرى جاب بيجامتة لحد ديلها
واسماعين بدال ما يجرى قال يا رجلى 
رجلى مالها !
بص شاف الدم سايح من عاليها ومن واطيها
وياللى جاى ياللى رايح .. المجلة مش لاقيها
حبة واتلموا الظنايا الى هما البوابين والحكاية والرواية
قالهم ده كلب مين ؟
كلب مين ماكلب مينش سمعة زود حبتين
قاله واحدة فيهم أمشى اللى جابك عنده مين
قال ده شارع يا مواشى للى راكب واللى ماشى
كلمة من ده وكلمة من ده
ظاطو واتقلبت فضيحة 
قول نهاية والقصد من ده
اسماعين أخد الطريحة
راحوا قسم الشرطة طبعاً .. والنيابة كفيلة بيهم
واترموا فى الحجز جمعاً .. لما يجى الدور عليهم
حبة والشاويش آمين قال .. سعيد النقشبندى
قام غريم عم اسماعيل .. قاله محسوبك يا فندى
قام سى سمعة يروح معاه .. الشاويش قال غور بدمك
فوق قفاة . كف طرقع .. داهية ف امك
تفتكر سى سمعة يفضل قد ايه فى القسم نايم ؟
استضافة الحجز جمعة . يابلاش ... آدى العزايم !
شاف بلاوى ما تتحكيش م الجماعة المحبوسين
قال يا عالم يا شاويش .. يا نيابة يا مسؤلين
طلعوه بعد المناهدة . جثة من جحر الديابة
هى حسبة ساعة واحدة .. كان فى مكتب النيابة
قاله مالك يا اسماعيل .. قاله مالى زى البُمب
قاله عضك فوكس فين .. قاله سيبنى أروح لحالى
انت شوف سى فوكس يمكن خد تسمم غصب عنى
الوكيل قال برضو ممكن 
والشاويش قاعد يغنى
انت فين والكلب فين انت قدة يا اسماعين
طب ده كلب الست يابنى . وانت تطلع ابن مين
هيص يا كلب الست هيص
لك مقامك فى البوليس
بكرة تتولف وزارة
للكلاب .. ياخدوك رئيس ..

كلمات . أحمد فؤاد نجم

كان لدى السيدة أم كلثوم كلب . وكانت تسكن فى حى الزمالك .. وبالصدفة وبمرور أحد الشباب من امام قصر السيدة ام كلثوم هجم كلب السيدة على ذلك الشاب مما أدى الى اصابتة باصابات بالغة  منعتة من مزاولة نشاطاتة ودراستة اذ انه كان طالب بكلية التربية الرياضية وكان هذا الحادث يكاد يكون قضى على مستقبلة .. هذا الحدث اغضب عمنا نجم جداً وكان هذا دافعاً ورد فعل عبر عنه فى تلك القصيدة واحد روائعة بعنوان " كلب الست "

0 للتعليق >>> إضغط هنا: