على فيــن ؟!

إبتديت الاحظ أشياء بتحصل عليها علامات استفهام كتيرة .. الله أعلم ممكن تاخدنا على فين
يعنى مثلا ، زلزال اليابان ممكن يأثر على مصر نظراً لإعلانهم عن حظر تدوال السلع الغذائية وده يحرمك من انك تستورد القمح ، ويقودنا ده  لدولة أخرى توفر لنا إستيراد السلعة وشئ طبيعى جداً أنك تشترى بضعف السعر مثلا طبقا لما تحدده عملية التدوال ومصر الآن عجلة الإقتصاد بها تكاد تكون متوقفة إزاى أربط ما بين الاتنين ؟!
ليه الإخوان المسلمين هما وفلول الحزب الوطنى ، يصوتوا ب نعم للتعديلات الدستورية 
ونازلين بتقلهم وحملات إعلانية ضخمة ، يعنى إحنا نعمل ثورة ويجى الوطنى والإخوان يستفادوا بأكبر عدد كراسى فى البرلمان !! قطعا الدستور مهلهل وفاقد شرعيتة ومواد كتير بتناقض بعضها ، مادة تتيح فترة رئاسية 4 سنوات وفى نفس الدستور مادة 190 بتتيح فترة رئاسة 6 سنوات !!! حتى المادة 189 مكرر التى الزمت الرئيس بوضع دستور جديد جميل ولكن  أخر سطر فيها بيقول : وهذا كلة طبقا للمادة 189 الى هى الاساسية ، وهى تجيز التعديل ولا تلزم ولا تحدد فترة يوضع بها دستور جديد ، يعنى حسبة برما ومتاهات مالهاش آخر 
بخلاف الصلاحيات الى فى ايد رئيس الجمهورية يعنى يقدر يحل مجلس الشعب يقدر يحل مجلس الشورى يقدر يغير رئيس الوزراء ، يعنى ديكتاتور جديد 
بخلاف كل ده للى ما قراش الدستور لا قبل ولا بعد التعديل ، حاليا ما فيش وقت تناقش فية المواد إفتكر بس ايه الى حصل على مدار 30 سنة من العمل بالدستور ده .. وانت تعرف موقفك من نعم أو لا ..
كمان حاجة غريبة جدا إن يتم الإفراج عن عبود الزمر القاتل السفاح والإعلام يعمل منة بطل !! والناس تستقبلة بالترحاب !! بخلاف تخوفاتى من رجوعة لممارسة الحياة السياسية بفكرة ده .
والاغرب ان يتم الكشف عن شبكة تجسس لواحد من جنسية ايرانية موجود فى مصر وبيشتغل لحساب الموساد ، طبعا المصالح الشخصية شغالة فى الفترة دى الله ينور
وبرغم من البدء فى اعادة بناء كنيسة الشهيدين بمركز اطفيح مازال الاقباط يريدون التظاهرأمام ماسبيرو ! .. على شهادة أحد الشباب الاقباط الواعى طبعا أن فى قناة قبطية تابعة لآمريكا بتشحن وتحث الآقباط على التظاهر بخلاف القساوسة الى الله أعلم بنيتهم فى الحديث عن الغاء المادة التانية من الدستور .. 


واموت واعرف الست هيرلى كلينتون دى عايزة ايه بالظبط ، إرحمونا بقى وسيبوا شئونا الداخلية ننظمها بنفسنا .. كمان الله أعلم مصير موضوع مد الغاز لإسرائيل دى هاترسى على اية ومعهدة كامب ديفيد مصيرها اي وعواقب كل ده على العلاقات الخارجية مع أمريكا هايكون شكلة ايه ورد الشارع المصرى هايكون شكلة ازاى وناهيك بقى عن موضوع حوض النيل وإنقسام السودان .. ربنا يرحمنا


وبرغم من كل ده المصريين مازالوا بيتظاهروا ومطالب ما بتنتهيش واعتصامات فى كل الجامعات ، ومظاهرات فئوية يوميا فى شتى الاعمال .!! 
انا شايف ان حاليا الى ليه الحق فى التظاهر واضم ليه صوتى و بقوة هم أسر الشهداء ، لحد النهاردة الناس دى ماشافوش ولو تعويض مادى !! ولو محاسبة ظابط شرطة بتهمة ضرب النار . بالرغم من إعلان اسماء لعدد من الظباط المتهمين فى ده 


 ليه كمية التباطئ فى محاسبة المسؤلين واختفاء كامل لجمال وعلاك مبارك ، والثلاثى صفوت الشريف وزكريا عزمة وسرور كما هما وكأنهم أشرف ناس فى البلد ولا شوفنا حتى إقرار ذمة مالية لاى حد فيهم !! 


ايه الى بيحصل ورايحين على فين ..... الله أعلم 

0 للتعليق >>> إضغط هنا: